Өскемендегі Чечек тауын бос уақытты өткізуге бейімделеді

Қала күніне орай жаңа демалыс аймағын ашу жоспарлануда, оны жайластыру жұмыстары ағымдағы айда басталады.

Өскемен қаласының әкімі Алмат Ақышов 5 мамырда Чечек тауына барып, журналистерге абаттандыру жоспарлары туралы айтып берді.

— Бұл ескі Самар трассасы, оны тұрғындар серуендеу үшін пайдаланады. Бұл жердің ауасы таза, көрінісі де әдемі. Сондықтан дем алуға ыңғайлы еткіміз келеді, — деп атап өтті Алмат Ақышов. — Осы жерде жақсы қоғамдық кеңістік құру үшін үлкен инвестиция қажет емес. Дәретхана орнатуды қажет.

Қалалық ТКШ, жолаушылар көлігі және автожолдар бөлімінің ақпараты бойынша, ұзындығы үш шақырым болатын демалыс аймағының бойында екі автотұрақ (27 және 35 орындық) жабдықталады, кіре берісте шлагбаум орнатылады. Демалушылар үшін не қарастырылады? Бақылау алаңы, орындықтар, шамамен 10 беседка, барбекю аймағы, балаларға арналған ойын алаңы, "Чечек" шағын архитектуралық формасы.

— Демалыс аймағы кемпинг түрінде құрылады, сондықтан адамдар қаладан шықпастан отбасымен белсенді уақыт өткізе алады, — деді ТКШ бөлімінің басшысы Ержан Ибраев. — Бақылау алаңына келер болсақ, ол 10х10 метрді құрайды.