Қала басшылығы "Металлург" саябағында жұмыс істейтін кәсіпкерлерге аттракциондарды жаңартуды ұсынады

Қала әкімшілігінің басшысы саябақта жүргізіліп жатқан реконструкцияға кәсіпкерлер де қосылуы тиіс деп есептейді, деп хабарлайды YK-news.kz тілшісі.

Өткен жылдан бастап танымал демалыс аймағындағы жаңартулар жалғасып жатыр. Қазіргі уақытта саябақта жөндеу жұмыстарының екінші кезеңі аяқталуда. Аллеялар жаңа түсті төсеніштермен жабылған, 49 заманауи жарықтандыру тіректері, сондай-ақ урналар мен орындықтар пайда болды.

— Қазір мердігер мен тапсырыс беруші үшін бірінші міндет — барлық жұмыстарды 15 шілдеге дейін аяқтау, — деп түсіндірді жұмыс сапары барысында "Металлургке" барған Өскемен қаласының әкімі Жақсылық Омар. — Екіншіден, сапа өте жақсы болуы керек, өйткені бұл демалыс аймағы қала тұрғындары арасында ерекше сұранысқа ие. Мұнда әрдайым халық көп. Үшіншіден, біз адамдарға ыңғайлы болу үшін күндізгі уақытта Восток стадионынан саябаққа кіру туралы шешім қабылдадық. Ол үшін стадион әкімшілігімен сөйлесу керек. Сонымен қатар, 15 шілдеге дейін бұрынғы сахна орнында скейт-паркін аяқтау керек.

Өз тарапынан қала басшысы осындай ауқымды өзгерістерге жауап ретінде саябақ аумағында жұмыс істейтін кәсіпкерлердің де белсенділігін күтетінін атап өтті.

— Осы атқарылып жатқан жұмыстардың олар үшін де пайдалы екенін түсінуі керек, — деп түйіндеді Жақсылық Мұқашұлы. — Бәрі жақсы жаққа өзгеруде және кәсіпкерлер де аттракциондарын жаңартуы керек. Біз аттракциондардың  өте ескі екенін және демалыс аймағының жаңа көрінісіне мүлдем сәйкес келмейтінін көріп отырмыз. Адамдар абаттандырылған саябаққа көбірек келеді, сәйкесінше, деңгейімізді төмендетпеу үшін бизнес иелері де өз үлестерін қосуы керек.