ШҚО мектептеріндегі жас мұғалімдерге жүктеме жетіспейді, ал тәжірибелі ұстаздар екі мөлшерлемеде жұмыс істейді
Жаңа оқу жылында Шығыс Қазақстанда білім беру үдерісін 12 мыңнан астам педагог қамтамасыз етеді. Сонда да 97 мұғалімнің орны әлі де бос тұр. Орыс тілінде оқытатын мектептердегі бастауыш сынып мұғалімдері, математика, орыс тілі мен әдебиеті пәндерінің мұғалімдері сұранысқа ие.
ШҚО білім беру қызметкерлерінің тамыз конференциясында кадрлық жағдай туралы сөз болды. Облыс әкімі Нұрымбет Сақтағанов бос жұмыс орындары статистикасында әрдайым байқала бермейтін мәселеге назар аударды: мұғалімдер тапшылығының орнын көбіне мектепте жұмыс істеп жүргендердің жүктемесін арттыру арқылы толтыруға тырысады.
Өңір басшысының айтуынша, мұндай тәсіл білім беру үдерісінің сапасына кері әсер етуі мүмкін. Сонымен бірге мәселенің екінші жағы да бар: ол өңір мектептеріне тартуға тырысып жатқан жас мамандарға қатысты.
– Біз өңірлерге келетін жас мамандар туралы үнемі айтып отырамыз, – деді Нұрымбет Сақтағанов. – Олар өз мамандығында тұрақтап, өңірдің келешектегі кадрлық негізін қалыптастыруы тиіс. Алайда қазір негізінен келген педагогтардың саны ғана ескеріліп, мамандардың кейінгі тағдыры жеткілікті деңгейде қадағаланбайды. Білім беру жүйесінде қанша жас мұғалім жұмыс істеп жатқанын, қаншасы кеткенін және олардың мамандықты тастап кетуге не мәжбүрлейтінін түсіну маңызды.
Аймақ басшысы нақты жағдайды мысалға келтірді: зейнет жасындағы ұстаздар кейде екі мөлшерлемеде жұмыс істеп жатады, дәл осы кезде мектепке жаңа келген жас маманға «сағат жоқ» деген жауап қайтарылуы мүмкін.
Әкімнің пікірінше, кадр саясатын келіп жатқан жас мамандар санының көрсеткіші төңірегінде емес, олардың мамандықта орнығуына негіздеп құру қажет. Ол үшін әлеуметтік қолдау, баспанамен қамтамасыз етуге көмектесу, жаңа орынға бейімделу және тәлімгерлік жүйе қажет.
Конференцияда ұсынылған мәліметтерге сүйенсек, бүгінде педагогтарға деген ерекше қажеттілік Алтай, Самар және Шемонаиха аудандарында, сондай-ақ Риддерде сақталып отыр. Бұл жерде мәселе айрықша айқын байқалады: егер білім беру саласында жұмыс істеуге ниетті мамандар жетіспесе, онда қазіргі мұғалімдердің жүктемесі одан бетер арта түседі.
Нәтижесінде тұйық шеңбер пайда болады. Мектепке жаңа мұғалімдер керек, жас маманды шақырады, бірақ сағаты жеткіліксіз, қолдау мен тұрақтап қалуға мүмкіндік болмаған соң, ол жұмыстан кетіп қалуы мүмкін. Ал оның жүктемесін қайтадан қалған мұғалімдерге бөлуге тура келеді. Сондықтан конференцияда қойылған міндет тек 97 бос жұмыс орнын толтырумен шектелмейді. Мектепке келген жас мұғалімдердің сол жерде тұрақтап қалуын қамтамасыз ету маңызды.